الجمعة، 17 أكتوبر 2008
الخميس، 10 يوليو 2008
( يا فتاح .. ياعليم .. يرزاق يا كريم ؛ أصبحنا وأصبح الملك لله )
هكذا يبدأ الشيخ يحيى طقوسه اليوميه ؛ يراقب بزوغ الخيط الابيض من الخيط ..؛ يردد الايات الكريمه ؛ مع صوت الترتيل من اذاعه القرأن الكريم ؛ تنزل الايات بردا وسلاما على نفسه ؛ فيزداد قناعه ورضا بحياته ؛ حتى اذا اعلن المذيع .
( ننتقل الان الى اذاعه خارجيه )
تدب وتسرى فى اعضائه قوه لم يعهدها من قبل ؛ يتحسس رأسه ذات الشعر القليل ؛ والتى اشتعلت منه شيبا ؛ يجذب ساقيه النحيلتين ؛ يبعد الغطاء قليلا ؛ يردد .
( يا فتاح يا عليم قوينا يارب )
بنظره حانيه وابتسامه تعلوها الرضا ؛ يتأمل رفيقه الدرب ؛ يغمزها فى كتفها برقه .
_ يا أم بهيه .. صلاه الفجر وجبت .
_ يا شيخ ! انعس شويه ؛ لسه بدرى ؛ القرأن بيقرا .
_ يا أم بهيه قومى .. الرزق فى البكور .
يتكىء الشيخ على باب الغرفه المقفول ؛ يجذبه متمتما .
_ ايه ! وهن العضيم .. يا قوه الله .
يدفع الشيخ طلمبه المياه ؛ التى تسكن الجانب الايمن من ساحه البيت ؛ بيدين عفيتين ؛ يتوضأ فيسبغ الوضوء ؛ يدعو . اللهم اجعلنى من الطاهرين المقبولين يا رب ؛ ينادى .
_ يا أم بهيه قومى افتحى الابواب قدام رزق النهار .
_ اييييه الله يصبحك بالخير يا بهيه ؛ بنت ابوها بصحيح .
_ أول ما أقول ( يا فتاح يا عليم ) تسبقنى على الطلمبه ؛ عفيه ؛ بنت ابوها .
_ يا شيخ ربنا يّهدى سرها فى بيت جوزها .
تصمت قليلا ثم تكمل ..
_ وربنا يخليلنا فايز ابننا بكره يتجوز ويملا البيت عيال ...
_ فايز .. يعوض الله .. ويتمتم ( انه عمل غير صالح )
يكمل الشيخ ملابسه ؛ يلتف بالعبائه السوداء .يقبض على العصايا العوجه ؛ يهم بالخروج ؛ يطوح العصا ؛ يضرب بها الارض ؛ تعلوه مسحه من حزن ؛ يهز رأسه ؛ يزم شفتيه ؛يتمتم ..
_ايييه يا بركه دعاء الوالدين.
بيده العفيه يزيح مزلاج الباب الكبير ؛ يجذبه بقوه ؛ ينتشى حين تصافحه نسمه الهواء البارده ؛ يأخذ نفسا عميقا ؛ يطرد به نسمات الهواء الساكنه صدره طيله الليل الفائت قليلا .
_ بسم الله توكلت على الله ؛ لا حول ولا قوه الا بالله .
يخطو بقدميه النحيلتين القويتين ؛ فى الشارع الغارق فى ظلمه الليل ؛ يهش بعصاه الكلاب حتى لا يفقد وضوءه ؛ يضرب الحجاره ؛ يزيحها من عرض الشارع ؛ يمسح الشيخ الفضاء الواسع بعينيه ؛ للشارع الكبير فى الضوء الشحيح ؛ يتهلل فرحا ؛ ينقر بعصاه ؛ دقات ثلاث ؛ على شباك عال ؛ ينادى ...
_ يا شيخ حمزه ؛ الفجر واقف على الابواب ..
يحكم الشيخ العبائه ؛ يتفادى النسمات البارده ؛ يقبض باليسرى طرف العبائه ؛ يلمها على صدره ؛ يدب على الارض ؛ يهز رأسه ؛ موافقا ومؤكدا ( ان الصلاه كانت على المؤمنين كتابا موقوتا ).
يقع بصره على صوره الكعبه مرسومه على الحائط الجيرى ؛ تنفرج شفتاه ؛ تلمع عيناه ؛ يقرأ فى الضوء الشحيح وعيناه قد امتلأت بالدموع ..
( ولله على الناس حج البيت )
_ ايييييييييه كله بأمره ؛ يجعلنا من الطائفين كل عام .
تدب فى يده خفقه عفيه ؛ ينقر بعصاه ثلاث دقات ؛ على الباب نصف المفتوح .
_ يا شيخ طلبه الفجر واقف على الابواب..
يسرع الشيخ طلبه ؛ تسبقه نوبه من السعال المتواصل ؛ يتدثر فى عبائته ؛ يلتقط أنفا سه بالعافيه ؛ وجلباب صدره يعلو ويهبط . يدخل فى نوبات سعال مره اخرى ؛ ثلاث يضربون الارض فى الطريق اليومى للمسجد.
_ قلت لك من زمان ؛ الدخان ضياع للصحه والمال ؛ مغضب للرحمن .
_ يا شيخ يحيى بلاء ونزل على راسنا واحنا صغار .
_ راسك انت ؛ لكن صدقنى المنع عاوز عزم شديد ونيه عفيه.
_ يا شيخ لم يعد فى العمر كتير ..
_ امبارح فايز ابنك كلمنى فى الموضوع اياه تانى ..
ينتفض الشيخ ؛ تتسع عيناه وتلمع فى عتمه الشارع ؛ يقول محتدا وغاضبا .
_ يا شيخ طلبه احنا قفلنا الكلام فى الموضوع ده خالص .
تدب الحركه فى قدميه ؛ يهرول فى سعيه للمسجد ؛ يسبق الشيخين حمزه زطلبه ؛ يضرب كفا بكف ؛ تخرج انفاسه محمومه بنار الغيظ والحزن ؛ يكلم نفسه ..
_ نبيع الارض علشان نجيب عربيه تويوتا !!!! والله كلام صغار !
يقف على عتبه المسجد ؛ زاما شفتيه ؛ مقطبا جبينه ؛ يردد..
_ اعوذ بالله من الشيطان الرجيم .
يتحسس الشيخ حمزه جيب الصديرى ؛ يمد يده ؛ يشعر بالدفء ؛ يجذب مفتاح الجامع
_ اتفضل يا شيخ يحيى
الشيخ ينظر اليهما ؛ يتفحص ؛ يدقق ؛ يهز رأسه بسؤال حائر ..
ترى من وراء هذا الولد الخائب ؟؟
تلمس قدم الشيخ حصير الجامع ؛ يغمض عينيه ؛ يردد ..
_ اعوذ بالله .. اعوذ بالله .
فى المسجد وصوت الترتيل يعلو شيئا فشيئا ؛ يهدأ الشيخ . يصفو نور وجهه ؛ تعلو ابتسامه الرضا ؛ يردد الايات اماما للمصلين .
نطر العبائه من كتفيه حين وصلالى بيته بعد الصلاه . تناولتها أم بهيه ؛ تراقب عينيه اللتين يقدح منهما الشرر.
_ صباح الخير يا شيخ ... خير كف الله الشر .
_ قولى للمحروس ابنك . يبطل يسوق عليّ الناس ؛ انا قلتها كلمه .
بيع الارض لأ ؛ ارهن ارضى للبنك لأ..
يا شيخ على مهلك ؛ المال مالك ؛ والولد ابنك ؛ وحيدك !
_ ابنى يشتغل معايا فى الارض ؛ يعزق ؛ يروى ؛ يزرع ؛ يحصد ؛ مش يلبس بنطلون محزق ويلف يدور على قهاوى النت مع العاطلين .
_ ما تنساش ان ابنك متعلم !
_ متعلم ايه وهباب ايه ؛ دبلوم زراعه اخده بالعافيه ؛ لو كان خد شهاده عاليه ؛ يمكن كان باع البيت والارض وباعنا انا وانتى كمان .
يضع قدميه على المصطبه العاليه ؛ يرفع الثانيه عاليا ؛ يقفز على ظهر الحمار بعافيته الشحيحه ؛ تناوله حبل البقره والجاموسه وصره الطعام ؛ يهز رأسه فى حزن عميق ؛ يقول بنفاذ صبر ..
_ صحى الافندى ابنك ؛ خليه يحصلنى على الغيط ؛ عندنا شغل كتير .
_ ايييييه العافيه يا أم بهيه .
بصوت مخنوق يقول ..
_ هشى الخروف هشى ؛ خليه يمشى ورا البهايم ..
فى الطريق الطويل المترب للغيط البعيد ؛ كانت رأس الشيخ ؛ تطن كخليه نحل فى موسم العمل ؛ فكره تروح واخرى تأتى ؛ يقلب افكاره كما يقلب راكيه النار ؛ يكلم نفسه ؛ تشتعل رأسه بأمرين كلاهما مر ؛ طول الطريق يتأمل البقره الصفراء ذات السلاسل الاصيله ؛ التى ورثها عن ابيه ؛ عن جده ؛
_ يا سلام ؛ بسم الله ما شاء الله ؛ شوف ماشيا ازاى عندها عزه وكبرياء .
_ صحيح ما أهبل الا بنى ادم ؛ عاوزنى ابيع الارض يا فايز ؛ الا كمان ابيع البهايم معاها ؟.
_ دا حتى الحمار ؛ عارف طريقه ؛ تركبه ياخدك كده على الغيط من غير توجيه
_ وانت يا فايز ؛ مش عارف طريقك ليه يا ابنى ؟؟
_ اييييييييه لا حول ولا قوه الا بالله .
يربط الشيخ البهائم ؛ يخلع جلبابه ؛ يعلقه على مسمار فى العشه ؛ وبجواره يعلق صره الطعام ؛ يشمر عن ساعدين سمراوين ؛ بهما عافيه ؛ ينحنى ؛ يحتضن اعواد البرسيم النديه ؛ يوزعها بالعدل بين البهائم ؛ يلتقط فأسه على كتفه ؛ يشد شملته على وسطه ؛ يكبس الطاقيه فى رأسه ؛ لتقيه ضربات الشمس الحارقه ؛ يمسح القنايه الطويله ؛ يلف الحدود ؛ يقطع الخطوط الطويله الى ترابيع صغيره ؛ يجهز الارض لموسم زراعى جديد .
. كلما شعر بالتعب ؛ يقف مستندا على يد الفأس الطويله ؛ يزيح حبات عرق جبينه ؛ يتطلع الى المصرف الصغير ؛ يدقق النظر ؛ يضع كف يده على حاجبه ؛ يحجب عنها اشعه الشمس الحارقه وينظر على مدى بصره ؛ لعل ولده يأتيه ؛ يعاونه ؛ يقول له خلى عنك يابا ؛ يرحم شيبته ؛ لا احد يسمع ولا احد يرى !.
_ اييييييه العافيه يا بنتى . فينك يا بهيه .
_ بنت بصحيح ؛ لكن بميت راجل .. كانت يدى فى البيت والغيط .
_ ايييييه سنه الحياه .. وما لسنه الحياه تبديلا ..
كاد النهار ان ينتصف ؛ الشمس تقدح لهيبا ؛ الفلاحون يجهزون الارض ؛ يحرثون ؛ يخططون ؛ الاولاد يساعدون الابآء ؛ يعرقون فى ارضهم .
_ العافيه يا شيخ ..
_ ياااااااااه العافيه يا ابنى ..
_ لسه فاكر ابوك يا فايز .. والله وفيك الخير .
_ يا عم ريح نفسك انت غاوى تعب وهده حيل .
_ يا ابنى احنا بنشتغل فى ارضنا .
يهز رأسه ساخرا ؛ ضاربا الحصوات الصغيره ؛ بيديه وقدميه .
_ ارضنا بتجبلنا كام فى السنه تقدر تقولى ؟
_ الحمد لله سترانا ؛ وخيرها زياده
_ خير ! ؛ خير ايه يابا ؛ هو فين الخير ده !؟
_ يا ابنى لا تكفر بالنعمه ؛ استغفر ربك ؛ خد الفاس ولف التربيعه ..
قانطا ؛ مكفهرا ؛ يمسك الفأس بأطراف اصابعه ؛ ضرب الارض ضربتين ؛ فى الثالثه نهجت انفاسه ؛ احمر وجهه ؛ غرق فى عرقه ؛ قذف الفأس بعيدا ؛ واشاح بيده غاضبا ..
_ يا عم خلصنا من العذاب ده ؛ ارحم نفسك وارحمنى معاك.
تابع خطواته حتى وصل الى رأس الارض ؛ جلس تحت شجره التوت ساخطا .
بدا الشيخ طويلا فى وقفته ؛ مهيبا فى صمته ؛يتأمل ولده ؛ يضرب كفا بكف .
_ فلاح ابن فلاح ولا يعرف يلف التربيعه ؛ والله دى حكايه ليها العجب ؛ تتسجل فى الكتب ويقراها الناس ..
_ صحيح ابن مدارس ؛ يده ناعمه ؛ يسهر طول الليل مع شله العاطلين فى قهاوى النت
ولم تطل وقفه الشيخ طويلا فى تأمله لابنه
بسمل وحوقل ؛ التقط فأسه ؛ وراح يعمل ويعمل ؛ حتى قطع عليه الشيخ حمزه حبل افكاره فى ارضه .
_ العافيه يا شيخ يحيى .
_ اهلا يا شيخ حمزه .
_ ايه اساعدك ؟
_ خلاص ؛ تربيعه واحده والارض تكون تمام .
_ بسم الله ما شاء الله ؛ عينى عليك بارده يا شيخ ؛ ولا شغل خمس رجاله .
_ يا حمزه انا بشتغل فى ارضى ؛ ومن بعد صلاه الفجر ؛ وهو النفر الاجرى يشتغل زى صاحب الارض ؛ دا تلاقيه كل شويه يقف يبص يمين وشمال ؛ يطقطق صوابعه ؛ يراقبك ؛
على رأى المثل اقلع طاقيتك والبسها اهو كله من النهار .
_ الله يسعدك يا شيخ .. اى والله معاك حق .
تحت شجره التوت ؛ الهواء ناعما ورقيقا يشمر الشيخ ساعديه يملأ حوض الطلمبه ؛ يفك رباط البقره يأخذها للحوض تشرب ومعها الحمار والجاموسه ولم ينسى الخروف .
يجذب الحصيره القديمه من العشه يفردها ويفتح سره الطعام وينادى ولده فايز
_ يا فايز .. قوم يا ابنى .. قوم الشغل خلص قوم كل .
يقوم فايز متثائبا مترنحا ؛ اصفر الوجه يبادر .
_ مالك يا ابنى ؛ انت تعبان ؛ ولا سهرات النت لحست مخك
_ يا با كفايه كده ؛ دى بقت عيشه تزهق وتذل
انصرف غاضبا متثائبا ؛ واكل الشيخ بنفس صافيه وهو ينظر لأرضه راضيا عما فعل ؛ ثم توضأ لصلاه الظهر وحين انتهى وجد الشيخ حمزه جالسا جواره عند راكيه النار
_ صب يا شيخ حمزه الشاى صب واشرب .
_ تقبل الله يا شيخ يحيى .
_ منا ومنك ان شاء الله .
_ فايز ماله كده ماشى غضبان وحالته نكد خالص .
_ يعوض الله .. يا حمزه فى ولدى .
_ يوه ؛ لا يا شيخ خد ابنك تحت جناحك كده وطيب خاطره
_ ابنى عايزنى ابيع ابويا وامى وجدى كمان ..
_ كلام ايه ده يا شيخ
__ يا حمزه الارض جدك وابوك تقدر تبيع ابوك ؛ عايزنى ابيع الارض ونشترى عربيه تجرى على اربع عجلات وسايقها عفريت ؛ تلبس فى شجره ولا يقابلك سواق سكران يبقى كأنك يا ابو زيد ما غزيت ؛ شوفت بقى الفكر الجديد بتاع بيع الاراضى .
_ ارضك يا حمزه مضمونه وعمرها ما تكدب عليك ؛ تزرع تحصد . وال ايه يقولك انا متعلم ؛ هو انا غلطان يا ناس انى علمته ؛
_ وبعدين المتعلمين دول بيصلحو الارض الضعيفه علشان تزرع !
_ هو بقى يبيع ارضه العفيه ليه لا يا شيخ حمزه لا ان ما بعش ارضى ابدا ؛ انا لسه بصحتى لما ابقى اموت يبقى يبيع نفسه ؛ يبيع ارضه ؛ يعمل اللى عايزه
_ يمصمص الشيخ حمزه شفتيه مغادرا وهو يردد
_ لا حول ولا قوه الا بالله .. هوه ده العلام والفكر الجديد نبيع اراضينا يا خلق ؟؟!!
بينما راح الشيخ يحيى يعمل ثانيا فى ارضه وهويغنى بنبحه باكيه
_ الارض ارضنا .. ولا حد زينا .. الارض ارضنا
حتى قطع غنائه صوت يقول
_ العافيه يا شيخ يحيى .
يرفع رأسه ؛ تطير الفأس من يده ؛ يفتح ذراعيه ؛ يحتضنها يتهلل وجهه والفرحه تنط من عينيه .
_ ايييييييه العافيه يا ابنيتى العافيه والقوه يا بهيه.
يبكى فى حضن ابنته بدموع قائلا .. اخوكى عايزنى ابيع ارضى يا بهيه
تمسح دموعه وتقبل يده باكيه .
_ انا وسعيد جوزى من النهارده ها نشتغل عندك باليوميه ياشيخ بالشهر زى ما تحب ؛ يضمها الشيخ لحضنه وعيناه تمتلىء بالدموع ..
_ لا يا بنتى لا .. اصحاب ارض . ارضك يا بهيه
(((( يا ترى انتى فين يا بهيه ))))
نشرت فى جريده الاهرام
30 \ 8 \ 2000
. اسلام عبد السلام .